Showing posts with label தி.மு.க.. Show all posts
Showing posts with label தி.மு.க.. Show all posts

Thursday, March 24, 2011

தி.மு.க.,வுக்கு - அ.தி.மு.க., சளைத்தது அல்ல ., இலவச திட்டங்களை வாரி வழங்கினார் ஜெ.,


சென்னை: தமிழக சட்டசபை தேர்தலில் எல்லாமே இலவசங்கள் என்ற கணக்கில் தி.மு.க.,வுக்கு அ.தி.மு.க., சளைத்ததல்ல என்பதை பறைசாற்றும் வகையில் அ.தி.மு.கவும் மக்களுக்கு கிடைக்கும் இலவச பொருட்களை பட்டியலிட்டுள்ளது. கல்லூரி மாணவர்களுக்கு இலவச லேப்டாப் என்ற தி.மு.க., அறிக்கையை மிஞ்சுவதாக காட்டும் வகையில் , பிளஸ்-1, பிளஸ்- 2 பயிலும் அனைத்து மாணவர்களுக்கும் இலவசமாக லேப்டாப் வழங்கப்படும். என்றும் தி.மு.க., அறிக்கையில் இடம் பெறாத புதிய இலவசமாக ஆடு, மாடுகளும் கிடைக்கும் என்றும் அ.தி.மு.க., தேர்தல் அறிக்கை வெளியிட்டு மக்களை கவர முனைந்துள்ளது.


திருச்சி ஸ்ரீரங்கம் தொகுதியில் போட்டியிட வேட்புமனு தாக்கல் செய்த அ.தி.மு.க., பொதுச்செயலர் ஜெயலலிதா, தேர்தல் அறிக்கையை வெளியிட்டார்.


தேர்தல் அறிக்கை முழு விவரம் வருமாறு: மாணவர்களுக்கு லேப்டாப் : பிளஸ்- 1, பிளஸ் - 2 பயிலும் அனைத்து மாணவர்களுக்கும் இலவசமாக லேப்டாப் வழங்கப்படும். மேலும் கலை, அறிவியல் அரசு மற்றும் தனியார் கல்லூரி மாணவர்களுக்கும் இலவச லேப்டாப் வழங்கப்படும். சாதிச் சான்றிதழ், இதர சான்றிதழ் பள்ளியிலே வழங்கப்படும். அரசு பள்ளி மாணவர்களுக்கு 4 செட் சீருடையும், காலணியும் இலவசமாக வழங்கப்படும். 10 முதல் 12ம் வகுப்பு வரை பயிலும் அரசு, தனியார் மாணவர்களுக்கு கல்வி உதவித் தொகை ஆகியன தேர்தல் அறிக்கையில் இடம்பெற்றுள்ளது. பள்ளி செல்லும் மாணவர்களுக்கு தேவையான பாதுகாப்பு வழங்கப்படும். கேபிள் டி.வி., அரசுடைமையாக ஆக்கப்படும். இத்தொழிலில் இருக்கும் ஏகபோகம் தடுக்கப்படும். அனைவருக்கும் இலவச கேபிள் டி.வி., இணைப்பு வழங்கப்படும்.


பேன், மிக்சி, கிரைண்டர் : அது இல்லாவிட்டால் இது என்பது போல் இல்லாமல், இல்லத்தரிசிகளுக்கு பேன், மிக்சி, கிரைண்டர் ஆகியன இலவசமாக வழங்கப்படும். நடமாடும் மருத்துவமனைகள் வீடு தேடி வந்து சிகிச்சை அளிக்கும். ஏழை மக்கள் வீடுகட்ட ரூ.1.8 லட்சம் பணம் மானியமாக வழங்கப்படும். மகளிருக்கு பேறுகால உதவித்தொகையாக ரூ. 12 ஆயிரம் வழங்கப்படும். அரசு ஊழியர்களுக்கு பேறுகால விடுப்பு ஆறு மாத காலமாக நீட்டிக்கப்படும். 58 வயதுக்கு மேற்பட்ட அனைவருக்கும் இலவச பஸ் பாஸ். திருமண உதவித் தொகை ரூ. 25,000 வழங்கப்படும். மேலும் 4 கிராம் தங்கம் வழங்கப்படும்.


மும்முனை இணைப்பு மின்சாரம் : கிராமம் மற்றும் நகர்புறங்களில் 4 ஆண்டு காலத்தில் மும்முனை மின்சார இணைப்பு தரப்படும். கரும்பு கெ?ள்முதல் விலை டன்னுக்கு ரூ. 2500 ஆக உயர்த்தப்படும். அரசு கரும்பு ஆலைகள் நவீனமயமாக்கப்படும். நிர்வாகம் சீரணைக்கப்படும். வீடு, தெ?ழில், விவசாயத்திற்கு தேவையான மின்சாரம் தடையின்றி வழங்கப்படும். மின்சார திருட்டை ஒழிக்க முன்னாள் ராணுவத்தினர் அடங்கிய மின்சார பாதுகாப்பு படை அமைக்கப்படும்.வறுமைக்கோட்டுக்கு கீழ் வாழும் நபர்களுக்கு 4 ஆடுகளும், முக்கிய கிராமங்கள் தேர்வு செய்யப்பட்டு 60 ஆயிரம் மாடுகள் வரை இலவசமாக வழங்க நடவடிக்கை எடுக்கப்படும்.


அரசு ஊழியர் நலனுக்கு பாதுகாப்பு : அரசு ஊழியர்கள் நலன்களுக்கு பாதுகாப்பு அளிக்கப்படும். அனைத்து குறைபாடுகளுக்கும் பேச்சுவார்த்தை மூலம் அவ்வப்போது தீர்வு காணப்படும்.தமிழக மீனவர்கள் இலங்கை கடற்படையினரால் தாக்கப்படுவதை தடுக்க மீனவர்கள் பாதுகாப்பு படை அமைக்கப்படும் என்றார். மீன்பிடிக்கு தடை விதிக்கப்படும் 45 நாட்களுக்கு மீனவர்களுக்கு உதவித் தொகையாக ரூ. 2000 வழங்கப்படும். பருவகாலத்தில் மீன் பிடிக்கு இடையூறு ஏற்படும் போது ரூ. 4000 உதவித்தொகை வழங்கப்படும். இலவசங்கள் வழங்குவதில் தி.மு.க.,விற்கு அ.தி.மு.க., சளைத்ததல்ல் என்பதை இக்கட்சியும் நிரூபித்துள்ளது.


நன்றி


தினமலர்

Thursday, March 10, 2011

தி.மு.க., - காங்கிரஸ் அடுத்த பலப்பரீட்சை

சென்னை: தி.மு.க., கூட்டணியில் தொகுதிப் பங்கீடு முடிந்துவிட்ட நிலையில், கூட்டணிக் கட்சிகள் எந்தெந்த தொகுதிகளில் போட்டியிடுவது என்பதை முடிவு செய்யும் அடுத்த கட்ட பலப்பரீட்சை ஆரம்பமாகியுள்ளது. குறிப்பிட்ட சில தொகுதிகளை காங்கிரசும், தி.மு.க.,வும் விரும்புவதால் நெருக்கடி உருவாகியுள்ளது.

காங்கிரசுடன் தொகுதிப் பங்கீட்டில் ஏற்பட்ட காலதாமதத்தைப் போல், தொகுதிகளை ஒதுக்குவதிலும் தாமதம் ஏற்பட்டு விடக்கூடாது என்பதில், தி.மு.க., கவனமாக இருக்கிறது. இதற்காக, காங்கிரஸ் போட்டியிட விரும்பும் தொகுதிகளை பரிசீலித்து அதை முடிவு செய்வதில் தி.மு.க., தீவிரமாக உள்ளது. கடந்த சட்டசபை தேர்தலில் வெற்றிபெற்ற தொகுதிகளை இம்முறையும் அக்கட்சிக்கு ஒதுக்கிவிட்டு, கூடுதல் தொகுதிகளுக்கு, அடுத்த முக்கியத்துவம் அளிக்க உள்ளனர். தேர்தல் கமிஷனின் தொகுதி சீரமைப்பினால், சில தொகுதிகள் நீக்கப்பட்டுள்ளன. சில புதிய தொகுதிகள் உருவாகியுள்ளன. இதனால், பாரம்பரியமாக இருந்த தொகுதிகளும், சில வி.ஐ.பி., தொகுதிகளும் விடுபட்டுள்ளன. இவற்றுக்கு மாற்றுத் தொகுதிகள் தேடுவதிலும் தொகுதி பங்கீட்டுக் குழுவினர் தனி கவனம் செலுத்துகின்றனர். தனித் தொகுதிகளை பிற கட்சிகளுக்கு தள்ளிவிட்டு, பொதுத் தொகுதிகளை தக்க வைத்துக் கொள்வதில் பல கட்சிகள் உஷாராக உள்ளன. ஆனால், ஒதுக்கப்பட்டுள்ள தொகுதிகளின் எண்ணிக்கைக்கு ஏற்ப பொதுத் தொகுதிகள் மற்றும் தனித் தொகுதிகளின் விகிதாச்சாரம் இருக்கும் என்று தெரிகிறது.


மேலும், சில கட்சிகளுக்கு குறிப்பிட்ட சில மாவட்டங்களில் தான் செல்வாக்கு உள்ளது. எனவே, அந்த மாவட்டங்களில் மட்டும் அதிகத் தொகுதிகளில் போட்டியிட அக்கட்சிகள் விரும்புகின்றன. அதனால், மற்ற கட்சிகளுக்கு அந்த மாவட்டங்களில் தொகுதி ஒதுக்குவதில் சிக்கல் ஏற்படக் கூடாது என்பதையும் கருத்தில் கொண்டு தொகுதிகளை ஒதுக்குகின்றனர். கட்சி மாறி வந்தவர்களுக்கு மீண்டும் வாய்ப்பளிப்பதில் பிற கட்சிகளுக்கு நெருக்கடி ஏற்பட்டுவிடக் கூடாது என்பதிலும், தொகுதிப் பங்கீட்டுக் குழு கவனமாக உள்ளது. வி.ஐ.பி., தொகுதிகளை பட்டியலிட்டு, அதை மற்ற கட்சியினர் கேட்கக் கூடாது என்றும் நிபந்தனை விதிக்கப்பட்டுள்ளது. குறிப்பிட்ட ஒரு தொகுதியைப் பெறுவதில் கூட்டணிக் கட்சிகளுக்கு இடையே போட்டி நிலவும்போது, குலுக்கல் முறையில் ஒரு கட்சிக்கு அந்த தொகுதியை ஒதுக்க திட்டமிட்டுள்ளனர். பா.ம.க., - விடுதலைச் சிறுத்தை - கொ.மு.க., ஆகிய கட்சிகளுக்கு தொகுதிகளை இறுதி செய்யும் பணி முடியும் தருவாயில் உள்ளதாக தி.மு.க., வட்டாரங்கள் கூறுகின்றன. வேட்பு மனு தாக்கல் செய்வதற்கு இன்னும் சில தினங்களே உள்ள நிலையில், தி.மு.க., கூட்டணியில் கட்சி வாரியாக போட்டியிட உள்ள தொகுதிகளின் பட்டியல் விரைவில் வெளியாகும் என்று எதிர்பார்க்கப்படுகிறது. மொத்தமுள்ள 234 தொகுதிகளில் தி.மு.க., - 121, காங்., - 63, பா.ம.க., - 30, வி.சி., -10, கொ.மு.க., - 7, முஸ்லிம் லீக் - 2, மூ.மு.க., - 1 தொகுதிகளில் போட்டியிடுகின்றன.

Saturday, March 5, 2011

தி.மு.க., காங்கிரஸ் கூட்டணி முறிந்தது : மத்திய அமைச்சரவையில் இருந்து விலகல்


சென்னை : மத்திய அமைச்சரவையில் இருந்து விலகுவதாகவும், பிரச்னையின் அடிப்படையில் வெளியில் இருந்து மத்திய அரசிற்கு ஆதரவளிப்பது என்றும் தி.மு.க., உயர்மட்ட செயல்திட்ட குழுவில் முடிவெடுக்கப்பட்டுள்ளது.

தமிழக சட்டப்பேரவை தேர்தலில் காங்கிரஸ் கட்சி ஆட்சியில் பங்கு, ஒருங்கிணைப்பு குழு போன்ற நிபந்தனைகள் விதித்தது. இதனால் 3 முறை நடந்த தொகுதி பங்கீட்டு பேச்சுவார்த்தையில் எந்த முடிவும் எடுக்கவில்லை. தி.மு.க., காங்கிரஸ் கட்சிக்கு 60 தொகுதிகள் வரை தர முன்வந்தது. ஆனால் காங்கிரஸ் கட்சி 63 இடங்களும், வேண்டிய தொகுதிகளும் தர வேண்டும் என கோரியது. இதற்கு தி.மு.க.,வில் எதிர்ப்பு கிளம்பியது.


இது குறித்து முதல்வர் கருணாநிதி வெளியிட்ட அறிக்கை விவரம் : சட்டசபை தேர்தலுக்காக மற்ற கட்சிகளுடன் கூட்டணி அமைக்கும் பணியில் தி.முக., ஈடுபட்டது.சோனியாவை நான் டில்லியில் சந்தித்த பின், காங்கிரஸ் - தி.மு.க., கூட்டணி அமைத்து சட்டசபை தேர்தலில் போட்டியிடும் என, அறிவித்தேன். காங்கிரஸ் சார்பில் பேச்சுவார்த்தை நடத்த வந்த போது, 2006ம் ஆண்டு தேர்தலில், போட்டியிட்ட விவரங்கள் தி.மு.க., சார்பில் எடுத்துக் கூறப்பட்டது.

தி.மு.க., - காங்கிரஸ் - பா.ம.க., மீண்டும் உறவு கொண்டுள்ள நிலையில், அந்த கட்சிகள் போட்டியிட்ட இடங்களைத் தவிர்த்து, எஞ்சியுள்ள மார்க்சிஸ்ட் கமயூ., இந்திய கம்யூ., போட்டியிட்ட 23 இடங்களை புதிதாக சேர்த்துள்ள விடுதலைச் சிறுத்தைகள், கொங்குநாடு முன்னேற்ற கழகம் போன்ற கட்சிகளுக்கு ஒதுக்கிய இடங்கள் போக, மீதமுள்ள இடங்களை தி.மு.க., - காங்கிரஸ் பகிர்ந்து கொள்ளலாம் என பேசப்பட்டது.

அவ்வாறு கணக்கிட்ட போது, காங்கிரஸ் கட்சிக்கு 51 இடங்கள் வந்தன. அந்த இடங்களை அதிகமாக்க வேண்டும் என்ற காரணத்தால், 51 இடங்கள் 53 என்றாகி பின், 55 என்றாகி, 58 என்றாகி கடைசியாக 60 இடங்கள் என்று குலாம் நபி ஆசாத் மூலம் தெரிவிக்கப்பட்டது. அதை மேலிடத்தில் தெரிவித்து விட்டு உறுதி செய்வதாகக் கூறினார். ஆனால், அவர்கள் ஒப்பந்தத்தில் கையெழுத்திட வராததோடு, இன்று (நேற்று) இரவு தொலைபேசி மூலம் தொடர்பு கொண்டு 63 சீட்கள் ஒதுக்க வேண்டும் என்றும், கேட்கும் தொகுதிகள் அனைத்தையும் தரவேண்டும் என்றும் தெரிவித்தனர்.

காங்கிரசிற்கு 60 இடங்கள் போதாதென்று 63 இடங்கள் கேட்பதும், அவர்கள் கேட்கும் இடங்களையெல்லாம் கொடுக்க வேண்டும் என கேட்பதும் முறைதானா என்பதை, அந்த கட்சி தான் முடிவு செய்ய வேண்டும். இது குறித்து இன்று மாலையில் நடக்கவுள்ள தி.மு.க., உயர்நிலை செயல்திட்ட குழுவில் உரிய முடிவு எடுக்கப்படும். என கூறியிருந்தார்.


மத்திய அமைச்சரவையில் விலகல் : இந்த விவகாரம் குறித்து விவாதிக்க தி.மு.க., ‌உயர்மட்ட செயல்திட்ட குழு கூட்டம் சென்னையில் கூடியது. இந்த கூட்டத்தில் மத்திய அமைச்சரவையில் இருந்து விலகுவதாகவும், பிரச்னை அடிப்படையில் மத்திய அரசிற்கு வெளியில் இருந்து ஆதரவளிக்கப்படும் என்று முடிவெடுக்கப்பட்டுள்ளது. மேலும் தி.மு.க., கூட்டணியில் காங்கிரஸ் நீடிக்க விரும்பவில்‌லை என்பது தெளிவாகிறது என தீர்மானம் நிறைவேற்றப்பட்டுள்ளது. 60 தொகுதிகளை தர முன்வந்த போதும் 63 தொகுதிகள் கேட்பது எந்த விதத்தில் நியாயம் எனவும் கேள்வி ‌எழுப்பியுள்ளது. மேலும் காங்கிரஸ் கட்சி போட்டியிடும் தொகுதிகளின் எண்ணிக்கையை அதிகரித்து கொண்டே சென்றதாகவும், போட்டியிடும் தொகுதிகளை தாங்களே முடிவு செய்து ‌கொள்வோம் எனவும், ஒப்பந்தத்தில் தொகுதிகளை பற்றி குறிப்பட‌ வேண்டும் என நிபந்தனை விதித்ததாகவும் தி.மு.க., கூறியுள்ளது. தொகுதி பங்கீட்டில் பிரச்னை ஏற்படுத்தியது ஆச்சர்யம் அளிப்பதாகவும் தி.மு.க., கூறியுள்ளது. இதனையடுத்து மத்தியில் தி.மு.க., சார்பில் இடம்பெற்றுள்ள அமைச்சர்கள் தங்கள் பதவியை ராஜினாமா செய்யுமாறும் கேட்டு கொள்ளப்பட்டுள்ளனர்..


பிரச்னைகளை உருவாக்க தெரியும்: மும்பையில் ஒரு விழாவில் பங்கேற்ற மத்திய நிதி அமைச்சரிடம் தி.மு.க., கூட்ணி குறித்து நிருபர்கள் கேட்டதற்கு அவர் பதில் அளிக்கையில்; அரசியல் உறவில் சில நேரங்களில் பிரச்னை என்பது வருவது இயற்கையே. அதே நேரத்தில் பிரச்னையை உருவாக்கவும், தீர்க்கவும் காங்கிரசுக்கு தெரியும் . தி.மு.க.,வுடனான பிரச்னைக்கு தீர்வு காணப்பட்டு விடும் என்றார்.

நன்றி


தினமலர்

Monday, February 28, 2011

தி.மு.க., - காங்., தொகுதி பங்கீட்டில் இறுக்கம்


தொகுதிப் பங்கீடு குறித்து பேசுவதற்கு காங்கிரஸ் தலைமை ஏற்படுத்தியுள்ள ஐவர் குழுவுடனான பேச்சுவார்த்தையில் உடன்பாடு எட்டப்படாத நிலையில், அடுத்த கட்ட தகவல்களை காங்கிரஸ் டில்லி தலைமையுடன் பகிர்ந்து கொள்ள தி.மு.க., முடிவு செய்துள்ளது.


ஐக்கிய முற்போக்கு கூட்டணியின் முதல் ஐந்தாண்டு ஆட்சியின் போதும், தற்போது நடைபெறும் மத்திய ஆட்சிக்கும் தி.மு.க., சிறந்த நண்பனாகவே இருந்து வருகிறது. கூட்டணியில் அங்கம் வகித்த பா.ம.க., - ம.தி.மு.க., போன்றவை தி.மு.க.,வுடன் முரண்பாடு ஏற்பட்டு வெளியே சென்றபோதும், தி.மு.க., - காங்கிரஸ் உறவில் சிக்கல் ஏதும் ஏற்படவில்லை. இலங்கைப் பிரச்னையில் கடுமையான நெருக்கடி ஏற்பட்ட போதும், காங்கிரசுடன் விரிசல் ஏற்படாமல் தி.மு.க., பார்த்துக் கொண்டது. தமிழக சட்டசபை தேர்தலை காங்கிரசுடன் இணைந்து சந்திக்க வேண்டும் என்ற காரணத்திற்காகவே தி.மு.க., இத்தகைய பொறுமையை கடைபிடித்து வந்தது. ஆனால், சட்டசபை தேர்தலுக்கான தொகுதிப் பங்கீடு பேச்சுவார்த்தை துவங்கியதும், இந்த போக்கில் மாறுதல் ஏற்பட்டு, விரிசல் அதிகரிக்கத் துவங்கியுள்ளது.


பொதுவாக, தமிழகத்தில் கூட்டணிக் கட்சியிடையே தொகுதிப் பங்கீட்டில் முட்டுக்கட்டை ஏற்படும்போது, காங்கிரசின் தலைமை தலையிட்டு பிரச்னையைத் தீர்க்கும். ஆனால், இந்த முறை, பேச்சுவார்த்தையின் ஆரம்பம் முதலே, டில்லி காங்கிரஸ் தலைமை தலையிடும் அளவுக்கு நிலைமை மாறியுள்ளது. பேச்சுவார்த்தையில் மத்திய உள்துறை அமைச்சர் சிதம்பரம், தொகுதிகள் பற்றி குறிப்புகளுடன் பேசியதும், கூட்டணி அரசுக்கு அடிப்படையாக கருத்துக்களை வலியுறுத்தியதும், தி.மு.க., தரப்பில் இறுக்கம் அதிகமானதற்கு காரணம் என்று தெரிகிறது. மேலும், கடந்த வெள்ளிக் கிழமை அறிவாலயத்தில் நடந்த பேச்சுக்களில் முடிவு இழுபறியானதற்கு அடையாளமாக, அந்தக் கட்டடத்தில் தன் அறையில் அமர்ந்திருந்த முதல்வர் இக்குழுவினரைச் சந்திக்கவில்லை.


தற்போது, காங்கிரஸ் அதிகபட்சமாக போட்டியிடும் வாய்ப்பைப் பெற வேண்டும் என்ற தகவலை, கட்சித் தலைவர் சோனியா மற்றும் பொதுச் செயலர் ராகுலுக்கு தெரிவித்திருக்கின்றனர். இதுவரை தி.மு.க.,வுடன் பேசிய அணுகுமுறையில் இருந்து சற்று வேறுபாடாக சிதம்பரம் தலைமையிலான குழு வைக்கும் கோரிக்கைகள், தி.மு.க.,வுக்கு சற்று அதிருப்தியை தந்திருக்கிறது. ஆனால், காங்கிரஸ் கூட்டணியை விட்டு விட முடியாத நிலை உள்ளது.இனி மேலிடப் பிரதிநிதியாக குலாம் நபி ஆசாத் வரலாம் என்ற பேச்சு இருக்கிறது. அதேசமயம் டில்லி தலைமையோ, தி.மு.க., பிரதிநிதிகளை சந்திப்பதையே தவிர்த்து வருவது குறிப்பிடத்தக்கது. டில்லியில் சோனியா அரசியல் ஆலோசகரை மட்டுமே டி.ஆர்.பாலு சந்திக்க முடிந்தது.


நன்றி

தினமலர்

Sunday, February 27, 2011

தி.மு.க., ஆட்சி தொடரும்; நானும் இருப்பேன்: கருணாநிதி உறுதி


சென்னை: ""மக்கள் ஆதரவுடன் தி.மு.க., ஆட்சியும் தொடரும்; நானும்இருப்பேன். திட்டப்பணிகளும் தொடரும். ஆறு ஆண்டுகளில் தமிழகம்குடிசைகள் இல்லாத முதல் மாநிலமாக மாறும் ,'' என முதல்வர் கருணாநிதிபேசினார் .


சென்னை ஆர்.கே.நகர் தொகுதி எம்.எல்.ஏ., சேகர்பாபு ஆதரவாளர்கள் தி.மு.க.,வில் இணையும் விழா தண்டையார்பேட்டையில் நேற்று மாலை நடந்தது. இணைந்தவர்களை வரவேற்று முதல்வர் கருணாநிதி பேசியதாவது: வடசென்னை பகுதி தி.மு.க., துவங்கிய இடம். அன்று பலரால் இட்ட விதை இன்று மரமாகி அதன் நிழலில் நாம் உள்ளோம். எம்.ஜி.ஆர்., துவக்கிய அ.தி.மு.க., கப்பல் திசை மாறி செல்கிறது. திசை மாறும் கப்பலில் இருக்க வேண்டாம். என சேகர்பாபு வந்துவிட்டார். எம்.ஜி.ஆர்., முதல்வராக இருக்க தகுதியில்லை; அவரை நீக்கி விட்டு என்னை முதல்வராக்குங்கள் என சொன்னவர் தான் இந்த அம்மையார்.


தமிழகத்தில் எத்தனையோ பிரச்னை இருந்தாலும், தேர்தலுக்கான நேரம் வந்துவிட்டது. யாருக்கு எத்தனை இடங்கள்; எந்தெந்த தொகுதிகள் என கட்சித்தலைவர்கள் பேசி முடிவெடுத்து, தொகுதியை அடையாளம் காட்டி, பேசும் காலமாக உள்ளது. மக்களாட்சி தத்துவத்தை உணர்ந்து மக்களுக்கு ஒரு ரூபாய்க்கு ஒரு கிலோ அரிசி, குறைந்தவிலைக்கு சமையல் பொருட்கள் கொடுத்து ஏழைகளின் வயிற்றுப்பசியை தீர்க்கும் ஆட்சியை நடத்துகிறோம். தமிழகத்தில் குடிசை இல்லா மாநிலமாக்க குடிசைகளை கான்கிரீட் வீடுகளாக மாற்றும் திட்டம் நடைமுறைப்படுத்தப்பட்டு வருகிறது. இன்னும் ஆறு ஆண்டுகளில் குடிசை இல்லா மாநிலமாக மாறும். அதுவரை நான் இருப்பேனா என்பீர்கள். நீங்கள் இருக்கும்போது நானும் இருப்பேன்; ஆட்சியும் இருக்கும். துவக்கிய எல்லா திட்டங்களும் தொடரும். இவ்வாறு முதல்வர் பேசினார்.


நன்றி


தினமலர்


Wednesday, February 23, 2011

தி.மு.க., கூட்டணிக்கு காங்கிரஸ் கட்சி 3 நிபந்தனை : சோனியாவிடம் நேரில் பேச தி.மு.க., திட்டம்

சென்னை : தி.மு.க., கூட்டணியில் தொகுதி பங்கீடு குறித்து பேசுவதற்குமுன், ஆட்சியில் பங்கு, குறைந்தபட்ச செயல்திட்டம், ஒருங்கிணைப்புக் குழுஆகிய மூன்று நிபந்தனைகளை, காங்கிரஸ் கட்சியின் ஐவர் குழுவிதித்துள்ளது. இதை ஏற்க மறுத்துள்ள தி.மு.க., தொகுதிப் பங்கீட்டில்சுமுகமான நிலையை ஏற்படுத்த, காங்கிரஸ் தலைவர் சோனியாவை நேரில்சந்திக்க திட்டமிட்டுள்ளது. முதல்வர் கருணாநிதியின் தூதுவராகடி.ஆர்.பாலு, சோனியாவை சந்திக்க உள்ளார்.


தி.மு.க., - காங்கிரஸ் இடையேயான தொகுதிப் பங்கீடு பேச்சுவார்த்தை, கடந்த ஞாயிற்றுக்கிழமை நடந்தது. துணைமுதல்வர் ஸ்டாலின் தலைமையிலான தி.மு.க., குழுவினருடன், மத்திய அமைச்சர்கள் சிதம்பரம் மற்றும் வாசன், தங்கபாலு, ஜெயந்தி நடராஜன், ஜெயக்குமார் ஆகியோர் கொண்ட காங்கிரஸ் குழு பேச்சு நடத்தியது. கூட்டணி ஆட்சிக்கு உறுதியளிக்க வேண்டும். குறைந்தபட்ச செயல் திட்டத்தை உருவாக்கி, அதை செயல்படுத்த ஒருங்கிணைப்புக் குழு அமைக்க ஒப்புக் கொள்ளவேண்டும் என்று காங்கிரஸ் சார்பில் அப்போது வலியுறுத்தப்பட்டது. இதற்கு மறுப்பு தெரிவித்ததோடு, மத்தியில் உள்ள ஐக்கிய முற்போக்கு அரசில் குறைந்தபட்ச செயல் திட்டம் ஏதுமில்லை. அதை செயல்படுத்த ஒருங்கிணைப்புக் குழுவும் அமைக்கப்படவில்லை. எனவே, அதுபோன்ற முறையை தமிழகத்தில் ஏற்படுத்த வேண்டிய அவசியமில்லை என்றும் தி.மு.க., தரப்பில் கூறப்பட்டது.


இந்த கருத்து வேறுபாட்டால், தி.மு.க., - காங்கிரஸ் இடையேயான பேச்சுவார்த்தை முன்னேற்றம் ஏற்படாமல் நின்றுபோனது. மேலும், ஆட்சியில் பங்கு வேண்டும் என்ற காங்கிரசின் கோரிக்கை வருத்தத்தை ஏற்படுத்தியுள்ளதாகவும், தொகுதிப் பங்கீடு பேச்சின்போது, ஆட்சியில் பங்கு என்பது தேவையற்ற ஒன்று என்றும், அதற்கு இப்போது எவ்வித அவசியமும் ஏற்படவில்லை என்றும், தி.மு.க., தரப்பில் கூறப்படுகிறது.ஆட்சியில் பங்கு அளிப்பது பற்றி, அவசியம் ஏற்பட்டால், தேர்தல் முடிந்து தான் பேச முடியும் அப்படி இருக்கையில், காங்கிரஸ் அக்கோரிக்கையை வலியுறுத்தியதால், தொகுதிப் பங்கீடு பேச்சுவார்தையின் போது பேசவேண்டிய முக்கிய அம்சங்கள் தடைபட்டுப் போனதாகவும் தி.மு.க., மூத்த நிர்வாகி ஒருவர் குற்றம்சாட்டுகிறார்.


அவர் மேலும் கூறுகையில், "தி.மு.க., தலைமையில் பல்வேறு கட்சிகளை உள்ளடக்கிய மெகா கூட்டணிகள் பலமுறை அமைக்கப்பட்டுள்ளன. அப்போதெல்லம் ஆட்சியில் பங்கு என்ற கோரிக்கை எழவில்லை. தி.மு.க., - காங்கிரஸ் கட்சிகள் இணைந்து, ஆட்சி பங்கு பார்முலாவை முன்வைத்து சந்தித்த 1980 தேர்தலில், படுதோல்வியை சந்திக்க நேர்ந்தது. இதனால், கூட்டணி ஆட்சி பார்முலா தமிழகத்துக்கு ஒத்துவராது' என்றார்.


இந்நிலையில், தொகுதிப் பங்கீட்டில் ஏற்பட்டுள்ள சிக்கலைப் போக்க, காங்கிரஸ் தலைவர் சோனியா தலையிட்டு தீர்வு ஏற்படுத்த வேண்டும் என்று தி.மு.க, முடிவு செய்துள்ளது. சோனியாவின் தலையீட்டுக்குப் பின்னரே தி.மு.க., - காங்கிரஸ் இடையே தொகுதிப் பங்கீட்டில் சுமுக உடன்பாடு ஏற்படும் என்று எதிர்பார்க்கப்படுகிறது.எனவே, முதல்வர் கருணாநிதியின் கருத்துக்களை சோனியாவிடம் கூறுவதற்காக, அவரை சந்திக்க டி.ஆர்.பாலு நேரம் கேட்டுள்ளார். இன்னும் ஓரிரு நாளில் சோனியாவை சந்தித்து அவர் விளக்கம் அளிக்க உள்ளார். இதன்பின், தொகுதிப் பங்கீடு பேச்சுவார்த்தையில் முன்னேற்றம் ஏற்படலாமென தி.மு.க., கருதுகிறது.

Saturday, February 19, 2011

தி.மு.க., கூட்டணியில் பா.ம.க.,விற்கு 31 சீட் ஒதுக்கீடு: காங்., அதிர்ச்சி



சென்னை: தி.மு.க., கூட்டணியில் பா.ம.க.,வுக்கு 31 சட்டசபை தொகுதிகளும், 2013ல் நடக்கும் ராஜ்யசபா தேர்தலில் ஒரு இடமும் ஒதுக்கப்பட்டு உள்ளன. முதல்வர் கருணாநிதியை அவரது வீட்டில் நேற்று காலை 9 மணிக்கு பா.ம.க., நிறுவனர் ராமதாஸ் சந்தித்தார். இரண்டு மணி நேரம் நடந்த சந்திப்பின் போது, இரண்டு கட்சிகளுக்கும் இடையேயான தொகுதி பங்கீடு முடிவானது. இதற்கான ஒப்பந்தத்தில் முதல்வர் கருணாநிதியும், ராமதாசும் கையெழுத்திட்டனர். வெளியில் வந்ததும், ராமதாஸ் நிருபர்களிடம் கூறும் போது, ""என் பேரன் திருமணத்துக்கு அழைப்பிதழ் கொடுக்க, முதல்வரை சந்திக்க வந்தேன். தேர்தல் உடன்பாட்டையும் முடித்துக் கொண்டு திரும்பியுள்ளேன். மகிழ்ச்சியுடன் முதல்வரை சந்திக்கச் சென்ற நான், மகிழ்ச்சியுடன் திரும்பியுள்ளேன்,'' என்றார்.


பின், நிருபர்கள் கேட்ட கேள்விகளுக்கு ராமதாஸ் அளித்த பதில் விவரம்:


* அழைப்பிதழ் கொடுக்க வந்த இடத்தில் தேர்தல் உடன்பாடு ஏற்படும் என்ற எதிர்பார்ப்பு இருந்ததா?


எதிர்பார்ப்பு இருந்தது; நிறைவேறியும் உள்ளது.


* காங்கிரஸ் தலைவர் சோனியாவை சந்திக்கும் திட்டம் உள்ளதா?


கடந்த இரு நாட்களுக்கு முன், டில்லியில் சோனியாவை அன்புமணி சந்தித்துப் பேசியுள்ளார்.


* சட்டசபை தேர்தலில் உங்கள் கட்சிக்கு வெற்றி வாய்ப்பு எப்படி உள்ளது?


தி.மு.க., தலைமையிலான கூட்டணியில் பங்கு வகிக்கும் பா.ம.க., - காங்கிரஸ் - விடுதலை சிறுத்தை உள்ளிட்ட கட்சிகளின் வெற்றி வாய்ப்பு பிரகாசமாக உள்ளது.

* கடந்த முறை தொகுதி பங்கீட்டின் போது, அள்ளியும் கொடுக்கவில்லை, கிள்ளியும் கொடுக்கவில்லை என்று கூறினீர்களே... இப்போதைய தொகுதி பங்கீடு எப்படி உள்ளது?


அதை நீங்களே முடிவு செய்து கொள்ளுங்கள்.

* கடந்த சட்டசபை தேர்தலில் ஒதுக்கப்பட்ட 31 தொகுதிகளே, தற்போதும் ஒதுக்கப்பட்டு உள்ளதே... இதனால், பா.ம.க.,வின் வாதிட்டு பெறும் சக்தி குறைந்து விட்டதா?

வாதிட்டு பெறும் சக்தி குறையவும் இல்லை; அதிகரிக்கவும் இல்லை. இவ்வாறு ராமதாஸ் கூறினார். பா.ம.க., நிறுவனர் ராமதாசுடன், கட்சித் தலைவர் ஜி.கே.மணி மற்றும் நிர்வாகிகள் இருந்தனர்.


காங்கிரஸ் அதிர்ச்சி! தமிழக சட்டசபை தேர்தல் தொகுதி பங்கீடு தொடர்பாக, சோனியாவை சந்திக்க டில்லி சென்ற முதல்வர் கருணாநிதி பேட்டியளிக்கும்போது, "பா.ம.க., எங்கள் கூட்டணியில் உள்ளது' என்று தெரிவித்தார். கூடுதல் தொகுதிகளை ஒதுக்குமாறு காங்கிரஸ் கேட்டதற்கு, "செக்' வைக்கும் வகையில், பா.ம.க., குறித்த அறிவிப்பை முதல்வர் வெளியிட்டதாக கூறப்பட்டது. இதை பா.ம.க., தலைவர் ராமதாஸ் மறுக்கவே, பரபரப்பு ஏற்பட்டது. முதல்வருடனான சந்திப்பின்போது, "பா.ம.க.,வுக்கு தொகுதிகளை ஒதுக்க வேண்டும் எனக் காரணம் காட்டி, காங்கிரசுக்கான தொகுதிகளை குறைக்கக் கூடாது' என, சோனியா வலியுறுத்தியதாக கூறப்படுகிறது. இதை பிரதிபலிக்கும் வகையில், "கூட்டணியில் பா.ம.க., சேர்வதை சோனியா விரும்பவில்லை' என, தி.மு.க., பொதுக்குழுவில் கருணாநிதி தெரிவித்தார். இந்நிலையில், பா.ம.க.,வை அழைத்து பேசி, அவர்களுக்கு 31 தொகுதிகளை ஒதுக்குவதாக நேற்று தி.மு.க., அறிவித்தது. இந்த அறிவிப்பால், காங்கிரஸ் அதிர்ச்சி அடைந்துள்ளது. 80 முதல் 100 தொகுதிகளை கேட்டு, காங்கிரஸ் பேரம் நடத்தி வரும் நிலையில், பா.ம.க.,விற்கு வாரி வழங்கியுள்ளதால், காங்கிரசுக்கான தொகுதி ஒதுக்கீடு குறையும் என்பது வெளிப்படையாக தெரிய வந்துள்ளது. பா.ம.க.,வை காரணம் காட்டி, காங்கிரசுக்கான தொகுதிகளின் எண்ணிக்கையை குறைக்க, டில்லி பயணத்தின் போது தி.மு.க., போட்ட திட்டத்தை, அக்கட்சி இப்போது செயல்படுத்தி விட்டது என்ற குமுறல் காங்கிரசார் மத்தியில் எழுந்துள்ளது.


2013ல் பா.ம.க.,வுக்கு எப்படி ராஜ்யசபா சீட் கிடைக்கும்? தி.மு.க., கூட்டணியில் பா.ம.க.,வுக்கு 2013ம் ஆண்டு ஒதுக்கப்பட்டுள்ள ராஜ்யசபா சீட் எப்படி கிடைக்கும் என்பது இப்போது கேள்விக்குறியாக உள்ளது. தமிழகத்தின் சார்பில் ராஜ்யசபா எம்.பி.,யாக உள்ள கனிமொழி, திருச்சி சிவா (தி.மு.க.,), மைத்ரேயன், இளவரசன் (அ.தி.மு.க.,), ஞானதேசிகன் (காங்.,), டி.ராஜா (மார்க்சிஸ்ட்) ஆகியோரது பதவிக்காலம் 2013ல் முடிகிறது. இந்த ஆறு இடங்களிலிருந்து தான் பா.ம.க.,வுக்கு ஒரு இடம் கிடைக்கும். தி.மு.க., கூட்டணியில் 2013ம் ஆண்டு வரை பா.ம.க., நீடிக்கும்போது, அப்போதுள்ள கூட்டணிக் கட்சிகளின் எம்.எல்.ஏ., எண்ணிக்கைக்கு ஏற்ப அந்தந்த கட்சிகளுக்கு ராஜ்யசபா சீட் கிடைக்கும். ராஜ்யசபா எம்.பி.,யாக வெற்றி பெற 34 எம்.எல்.ஏ.,க்களின் ஆதரவு தேவை. தி.மு.க.,வுக்கு ஒன்றுக்கும் அதிகமான எம்.பி.,க்களை தேர்வு செய்யும் வலிமை இருந்தால் தான் பா.ம.க.,வுக்கு ஒரு ராஜ்யசபா சீட்டை விட்டுக் கொடுக்கும். காரணம் பா.ம.க., 31 சட்டசபை தொகுதிகளில் தான் போட்டியிடுகிறது. தமிழகத்தில் 2008ம் ஆண்டு ஆறு உறுப்பினர்களை தேர்வு செய்ய ராஜ்யசபா தேர்தல் நடந்தது. தி.மு.க., சார்பில் மூன்று உறுப்பினர்களையும், காங்., சார்பில் இரண்டு உறுப்பினர்களையும், அ.தி.மு.க., சார்பில் ஒரு உறுப்பினரையும் தேர்வு செய்தனர். இதில், அன்புமணிக்காக ஒரு உறுப்பினரை விட்டுக் கொடுக்க வேண்டும் என்று தி.மு.க.,வை பா.ம.க., வலியுறுத்தியது. ஆனால், கூட்டணி கட்சியில் உள்ள மார்க்சிஸ்ட் கட்சிக்கு அந்த இடத்தை வழங்க வேண்டும் என்று தி.மு.க., கூறியதால், கூட்டணியை விட்டு விலகிய பா.ம.க., லோக்சபா தேர்தலில் அ.தி.மு.க., கூட்டணியில் இணைந்தது.

Saturday, February 5, 2011

தி.மு.க.,வுக்கு காங்கிரஸ் மேலிடம் நெருக்கடி: அதிக தொகுதிகளைப் பெற வியூகம்

தி.மு.க., - காங்கிரஸ் கூட்டணியில் இரு கட்சிகளுக்கும் தொகுதிகள் எத்தனை என்பது குறித்து நடைபெறும் திரைமறைவு பேச்சுவார்த்தைக்கான ஆரம்பகட்ட நடவடிக்கைகள் துவங்கி விட்டன. அதிக சீட்டுகளை பெற்றுவிட காங்கிரஸ் புது வியூகம் வகுத்துள்ளது. அதை முறியடிக்க நினைக்கிறது தி.மு.க., இரு கட்சிகளுமே பா.ம.க.,வை மையமாக வைத்து தொகுதிப்பங்கீட்டை நடத்தி முடித்துவிட தீவிரம் காட்டுவதாக தெரிய வந்துள்ளது. தொகுதி பங்கீடு பேச்சுவார்த்தையை கடைசி நிமிடம் வரை இழுத்தடித்து, அதிக தொகுதிகளைப் பெற காங்கிரஸ் முடிவு செய்துள்ளது.

காங்கிரசுடன் கூட்டணி குறித்து பேசுவதற்காக டில்லிக்கு கடந்த வாரம் தமிழக முதல்வர் கருணாநிதி வந்து, காங்கிரஸ் தலைவர் சோனியாவை சந்தித்துப் பேசினார். பின்னர் நிருபர்களிடம் பேசியபோது, "இரு கட்சிகள் சார்பிலும் குழுக்கள் அமைக்கப்படும்' என்றார். இந்த நிலையில், காங்கிரசுடன் தொகுதிப் பங்கீடு குறித்து பேசுவதற்கு தி.மு.க., தரப்பில் துணைமுதல்வர் ஸ்டாலின் தலைமையில் குழு அமைக்கப்பட்டுள்ளது. காங்கிரஸ் சார்பில் குழு இன்னும் அமைக்கப்படவில்லை. இதற்கான ஆரம்ப கட்ட பணிகளை காங்கிரஸ் துவக்கி விட்டதும் தெரியவந்துள்ளது. இதுகுறித்து டில்லியில் தகவலறிந்த வட்டாரங்கள் கூறியதாவது: முதல்வர் டில்லிக்கு வந்ததே காங்கிரஸ் கட்சிக்கு தொகுதிகளின் எண்ணிக்கையை இறுதிசெய்வதற்கு தான். ஆனால், அது சோனியாவின் சந்திப்புக்கு பிறகும் நடைபெறவில்லை. காங்கிரஸ் தரப்பில் 80 சீட்டுகள் வரை தர வேண்டுமென முதல்வரிடம் கோரிக்கை வைக்கப்பட்டது. இதை சற்றும் ரசிக்கவில்லை தி.மு.க., இதையடுத்தே குழுக்கள் அமைத்து பேச்சுவார்த்தை நடத்தி முடிவு செய்து கொள்ள இரு தரப்புமே முனைந்து உள்ளன.


கடந்த முறை, பா.ம.க.,வின் 31 இடங்களும், இடதுசாரிகளுக்கு ஒதுக்கிய 23 இடங்களும்தான் இப்போதைய பேச்சுவார்த்தையின் மையம். இடதுசாரிகளின் 23 இடங்களை அப்படியே தங்களுக்கு தரவேண்டும், அதோடு கூடுதலாகவும் சீட்களை ஒதுக்கவேண்டும் என்று காங்கிரஸ் எதிர்பார்க்கிறது. இந்த தகவல்களை டில்லிக்கு வரும் முன்னரே முதல்வர் கருணாநிதி அறிந்திருந்தார். இதை முறியடிக்க பா.ம.க.,வும் கூட்டணியில் இருப்பதாக காட்ட வேண்டுமென திட்டமிட்டு முதல்வர், டில்லியில் முதல் நாள் பேட்டியளித்தார். ஆனால், சற்றும் எதிர்பாராத விதமாக பா.ம.க., அதை மறுத்துவிட்டது. அதற்கு அடுத்தநாள் காங்கிரஸ் தலைவர் சோனியாவை, முதல்வர் சந்தித்தார். அப்போதுதான் பா.ம.க.,வை கூட்டணியில் சேர்ப்பதற்கு எதிர்ப்பும் தெரிவிக்க பட்டது. கூட்டணிக்குள் பா.ம.க., வந்தால் தங்களது எண்ணிக்கை குறையும் என்று காங்கிரஸ் நினைப்பதே இதற்கு காரணம். கடந்த தேர்தலில் கூட்டணியை விட்டு பிரிந்து சென்ற பா.ம.க.,வை திரும்பவும் ஏன் சேர்க்க வேண்டுமென்று சோனியா கேட்டுள்ளதன் பின்னணியும் இதுதான்.


சோனியாவை சந்தித்துவிட்டு தமிழ்நாடு இல்லம் திரும்பியதும் தமிழக காங்கிரஸ் தலைவர்கள் சிதம்பரம், வாசன், தங்கபாலு ஆகியோர், முதல்வரை சந்தித்தனர். அப்போது அவர்களிடம் காங்கிரஸ் தலைமையிடம் பேசிய விஷயங்களை விளக்கியபோது, தமிழக சட்டசபை தேர்தலில் இத்தனை சீட்டுகளை காங்கிரஸ் கேட்பதில் நியாயம் உள்ளதா என்று முதல்வர் கேட்டதாக தெரிகிறது. "தேர்தலில் போட்டி என்பது கடுமையாக இருக்கப்போகிறது. அந்த சூழ்நிலையில், வெறும் தி.மு.க., - காங்கிரஸ் என இரு முக்கிய கட்சிகள் மட்டும் கூட்டணியில் இருந்தால் வெற்றி பெறமுடியாது. வேறுசில கட்சிகளும் இருந்தால்தான் வெற்றிக்கான நம்பிக்கை தொண்டர்கள் மத்தியில் வரும். காங்கிரசைத் தவிர வேறு ஒரு முக்கிய கட்சியும் கூட்டணியில் இடம்பெறுவதே நல்லது. அப்படிப்பார்த்தால் பா.ம.க.,வும், தே.மு.தி.க.,வும் தான் உள்ளன. தே.மு.தி.க., ஏற்கனவே தி.மு.க.,தான் தனது பிரதான எதிரி என்று அறிவித்து விட்டதால், அந்த கட்சியை கூட்டணியில் சேர்ப்பதை நினைத்துக்கூட பார்க்க முடியாது. மீதம் இருப்பது பா.ம.க.,தான். எனவேதான் பா.ம.க.,வை கூட்டணியில் சேர்க்கலாம்' என்று தி.மு.க., தொடர்ந்து கூறிவருகிறது. காங்கிரசுக்கு கூடுதல் சீட்டுகள் அளித்து கூட்டணி அமைச்சரவை போன்ற பிரச்னைகளுக்கு செக் வைக்கவும் இதன்மூலம் முடியும் என்று நினைக்கிறது.


தி.மு.க.,வின் இந்த முயற்சியை முறியடிக்க, பேச்சுவார்த்தையை கடைசி வரை இழுக்க காங்கிரஸ் திட்டமிட்டுள்ளது. இதன் மூலம் பா.ம.க.,வை ஓரம்கட்ட முடியும், அதிக சீட்களை தி.மு.க.,விடம் பெற முடியும் என காங்கிரஸ் கருதுகிறது. இதனால், இழுபறி கடைசி நிமிடம் வரை நீடிக்கவே அதிக வாய்ப்புள்ளது. இவ்வாறு அந்த வட்டாரங்கள் தெரிவித்தன.


தலித் தலைவர் தேடும் காங்.,: கடந்த தேர்தலில் பா.ம.க.,வுக்கு ஒதுக்கிய 31ம், இடது சாரிகளுக்கு ஒதுக்கிய 23ஐயும் சேர்த்து மொத்தம் 54 இடங்களில்தான் இரு கட்சிகளுக்கும் பிரச்னை. இந்த தேர்தலில் புதிதாக இடம்பெறும் விடுதலைச் சிறுத்தைகள் கட்சிக்கு 10 இடங்களை அளித்துவிட்டால், 25 இடங்கள்தான் பிரச்னை. காங்கிரஸ் தரப்பில் குழுக்கள் அமைக்கப்படவில்லை. என்றாலும் ஐந்து பேர் கொண்ட குழுவில் தற்போதைக்கு சிதம்பரம், வாசன், தங்கபாலு ஆகியோர் பெயர்கள் உறுதி செய்யப்பட்டுவிட்டன. மீதியுள்ள இருவரில் ஒருவர் தலித் சமூகத்தவராக இருக்க வேண்டுமென காங்கிரஸ் நினைக்கிறது. இதற்காக, தமிழக காங்கிரசில் உள்ள தலித் தலைவர்களில் யாரை நியமிக்கலாம் என்ற ஆலோசனையில் மேலிடம் உள்ளது. தி.மு.க.,வுடன் மாநில அளவில் நடைபெறப்போகும் பேச்சுவார்த்தையில் இந்த ஐவர்குழு பேசி முடித்துவிட்டு, இறுதியாக மேலிட தலைவர்கள் பேசி இறுதி செய்யவுள்ளனர்.